ചിലയിടങ്ങളിൽ പോകണമെന്നും
അവിടുത്തെ വഴികളിൽ ഇരിപ്പിടങ്ങളിൽ തണുപ്പിൽ വെയിലിൽ പ്രഭാതങ്ങളിൽ
അസ്തമിക്കുന്ന തീരങ്ങളിൽ
ഏറെ നേരം
മതിയാവുന്നതു വരെ ചെലവഴിക്കണമെന്നും ആഗ്രഹിക്കുന്നുണ്ട്.
പ്രവാഹങ്ങളിൽ നിന്നും തെന്നിമാറി
അൽപം നേരമുണ്ടാക്കി അവിടങ്ങളിൽ ചെല്ലുന്നുമുണ്ട്.
എന്നാലും കണ്ടെടുക്കപ്പെടാത്ത എന്തോ ഒന്ന്
അവിടങ്ങളിലെവിടെയോ മറഞ്ഞിരിപ്പുണ്ട്.
വീണ്ടും മാടി വിളിക്കുന്ന ഒന്ന്.
അടുത്തെത്തുമ്പോൾ അപ്രത്യക്ഷമാകുന്ന ഒന്ന്.
ഇങ്ങനെയുള്ള ഇല്ലാത്തവ ചേർന്ന
ഒരു പുസ്തകം
എല്ലാ പുസ്തകശാലകളിലും തിരയുന്നു
പുതിയ പ്രിൻറ് വരാനുണ്ട് എന്ന്
ഓരോ തവണയും വിൽപനക്കാരൻ പറയുന്നു
അടുത്ത വരവിൽ വരാമെന്ന് പറഞ്ഞ്
ഞാൻ മടങ്ങന്നു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ