ഒരു പൂജ്യം അധികമിട്ടു പോയതിനാൽ
മുഴുവൻ ഉത്തരവും തെറ്റിപ്പോയ
ഒരു കുട്ടി അധ്യാപകൻ്റെ അടുത്തുചെന്നു
അധികമിട്ട പൂജ്യം കാരണം പിന്നീടങ്ങോട്ട് ശരിയായതെല്ലാം തെറ്റിയതാണു സാറേ
ബോധപൂർവമല്ലാത്ത അശ്രദ്ധയ്ക്കുള്ള മാർക്കേ കുറയ്ക്കാവൂ സാറേ
മാർക്കൊന്നും കുറയ്ക്കുന്നില്ല
തെറ്റായ പൂജ്യത്തേയും കൊണ്ട് നീ ശരിയായ വഴിയേ പോയല്ലോ
ഏതോ ഒരു ഘട്ടത്തിൽ തെറ്റിനെ നീ തിരിച്ചറിഞ്ഞതിനാൽ
ഇനിയാവർത്തിക്കില്ലെന്ന ഉറപ്പിനാൽ
മുഴുവൻ മാർക്കും തന്നിരിക്കുന്നു
വഴി ശരിയായാൽ മതി
തെറ്റിയെന്ന തിരിച്ചറിവ് മതി
ബോധോദയത്തിൻ്റെ ബുദ്ധനാവാൻ
എന്ന് കുട്ടി ചിരിച്ചു