ഇഷ്ടമില്ലാത്തതിനാൽ
അലമാരയിലുപേക്ഷിച്ച ഒരു പാൻ്റ്
ഇളം നീല നിറമുള്ള പുതിയൊരു ഷർട്ട് വാങ്ങിയതോടെ വളരെ ഇഷ്ടമുള്ളതായി.
കയ്പായതിനാൽ
കഴിക്കാതിരുന്ന പാവയ്ക്ക
അധികരിച്ച പഞ്ചസാരയളവിൽ
മധുരമുള്ളതായി.
ഇമ്പം കുറഞ്ഞതെന്നു കരുതി
കേൾക്കാതിരുന്ന ഒരു പാട്ട്
യാത്രയ്ക്കിടയിൽ ഒരിക്കൽ മാത്രം കേട്ടപ്പോൾ
പലവട്ടം കേൾക്കാൻ കൊതിക്കുന്നതായി.
ഒരിക്കൽ അല്ലെങ്കിൽ മറ്റൊരിക്കൽ ഞാൻ
ഇഷ്ടമില്ലാത്തതിൻ്റെയൊക്കെയടുത്തു ചെല്ലുന്നു
അതിൻ്റെ ശ്വാസം കേൾക്കുന്നു
കണ്ണുകളിലേക്കുറ്റുനോക്കുന്നു
ഇഷ്ടക്കുറവിനാൽ തരിശായിക്കിടന്ന ഹൃദയത്തിൻ്റെ ദേശങ്ങളിൽ
കാറ്റു വീശുന്നു
മഴ പെയ്യുന്നു
കാലമെത്ര കഴിഞ്ഞാലും
ജീവൻ വെടിയാത്ത ആ വിത്ത് മുളപൊട്ടുന്നു
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ