കവല

ദിവസവും വെറുതെയെങ്കിലും ചെന്നില്ലെങ്കിൽ

ഉളളിൽ

ഇല്ലായ്മ തോന്നും

ദിനവും നനയ്ക്കുന്ന ചെടി

വാടുമെന്നതു പോലെ

വായിക്കാതിരുന്ന വാർത്ത

അറിയാതാവുന്നതു പോലെ

നമ്മുടെ ഒരരിക് ഇളകി ഇല്ലാതാകുന്നതു പോലെ

ഇപ്പോൾ വളരെ ദൂരെയായി ഞാൻ

ഉണ്ടായിരുന്നതൊക്കെ ഇല്ലാതായി

എന്നാലും

ഉണ്ടായിരുന്നതിൻ്റെ

അതേ ആത്മാവുള്ള

ഒരു ചായക്കട

ഒരാൽമരം

ഒരു ചാരു ബെഞ്ച്

ഒരു സുഹൃത്ത്

ഇവയെ

തേടുന്നുണ്ട്

ഏറെക്കുറെ

നേടിയെടുക്കുന്നുണ്ട് ഞാൻ.