കണ്ണുനീര്‍ത്തുള്ളി

അധ്യാപകന്‍ കുട്ടികളോട് പൂവുകളാകാന്‍ പറഞ്ഞു

കുട്ടികള്‍ തെച്ചിയും ചേമന്തിയും ചെമ്പരത്തിയുമായി
മുല്ലയും മന്ദാരവും മെയ് മാസപ്പൂവുമായി

ക്ലാസും പരിസരവും പൂമണംകൊണ്ട് നിറഞ്ഞു

മഞ്ഞയും ചുവപ്പും വെളുപ്പും ഒറ്റയ്ക്കും തെറ്റയ്ക്കും പാട്ടുകള്‍ പാടി
പാട്ടു കേള്‍ക്കാന്‍ തുമ്പികളും അടുത്ത ക്ലാസിലെ കുട്ടികളും വന്നു

പൂവാകാന്‍ വയ്യാത്ത കുട്ടിയെ ആരും കണ്ടില്ല

അവള്‍ വയ്യായ്ക ഉച്ചത്തില്‍ ഉച്ചത്തില്‍ വിളിച്ചുപറഞ്ഞുകൊണ്ടിരുന്നു

ആരും കേട്ടില്ല
അവളൊരു കണ്ണുനീര്‍ത്തുള്ളിയായി
പെയ്തുകൊണ്ടിരുന്ന മഴയില്‍ ഒഴുകിയൊഴുകിപ്പോയി.