വയസ്സ്

ചെറുപ്പക്കാരെന്നു കരുതിയവർക്കൊക്കെ വയസ്സായി

അവരുടെ തല നരച്ചിരിക്കുന്നു

കണ്ണുകളുടെ ചലനം അവധാനതയോടെയായിരിക്കുന്നു

മറുപടികൾ ആലോചിച്ചുറപ്പിച്ചതിനു ശേഷം മാത്രം

എന്നാലെപ്പോഴും അവരങ്ങനെയല്ല

നട്ടുവളർത്തിയ മാവിൽ മാമ്പഴം കാണുമ്പോൾ

അതിൽ പാഞ്ഞുകയറുന്നു

ഒഴിഞ്ഞ മൈതാനവും അതിൻ്റെ നടുവിലൊരു പന്തും കാണുമ്പോൾ 

കാലിൽ കൊടുങ്കാറ്റിരമ്പുന്നു

വിരുന്നിന് ചെന്ന വീട്ടിൽ

പശുവിനെയും കിടാവിനേയും കാണുമ്പോൾ

പുൽക്കെട്ടിൽ നിന്നൊരു കറ്റയെടുക്കുന്നു

നോക്കൂ 

കണ്ണടച്ചുള്ള ആ ഒറ്റനിൽപ്പിൽ

പഴയ രക്തം മുഴുവൻ

അയാളിലേക്കിരമ്പിയെത്തുന്നു