ലജ്ജ കൊണ്ട്
പണ്ട് കുളിമുറിയിൽ
ഒറ്റയ്ക്ക് പാടിയിരുന്ന പാട്ടുകളാണ്
ഇപ്പോൾ ആളുകൾ
ഓൺ ലൈൻ ഹൈവേയുടെ നടുവിലിരുന്ന്
പാടുന്നത്
പണ്ട് ആളെക്കാണിക്കാൻ മടിച്ച്
ചവറ്റുകൊട്ടയിലെറിഞ്ഞ എഴുത്തുകളാണ്
ഇപ്പോൾ
ബഹുവർണ്ണ പടത്തിൽ
കവിതയെന്നു പറഞ്ഞ് നിറയുന്നത്
സ്നേഹം കൊണ്ടു നിന്നോട് നിശ്ശബ്ദമായി പറഞ്ഞ വാക്കുകളെയാണ്
ഒച്ച കൂട്ടി വച്ച് എന്നെക്കുറിച്ച് എന്നെക്കുറിച്ച്
എന്ന അടിക്കുറിപ്പിൽ പോസ്റ്റ് ചെയ്യുന്നത്
പെതുവായതൊന്നും ശരിയല്ലെന്നു ശഠിച്ചവരാണ്
റേഷൻകടയിലേക്കും
നാട്ടു വിദ്യാലയത്തിലേക്കും
ധർമ്മാശുപത്രിയിലേക്കും പായുന്നത്
എല്ലാമായി എല്ലാമായി
എന്നുറപ്പിച്ചവരാണ്
അത്താഴത്തിനരികിട്ടാനായി
പുന്നെല്ല് വിതയ്ക്കുന്നത്
എൻ്റേത് എൻ്റേത്
എന്ന പുസ്തകം മാത്രം വായിച്ചവരാണ്
ക്യൂ നിന്ന് നമ്മുടേത് നമ്മുടേത്
എന്ന പുസ്തകം വാങ്ങിക്കുന്നത്
