തന്ത്രം

മാറി മാറി നിൽക്കുന്നു

അടുക്കളയിൽ കയറാതെ

വളപ്പിൽ കിളക്കാതെ

നടക്കാനിറങ്ങാതെ

അരിയും മുളകും വാങ്ങാതെ

കാടുപിടിച്ച മുറ്റം കണ്ടിട്ടും കാണാതെ

തിരക്കുണ്ടെന്നും

വയ്യെന്നും

പറഞ്ഞ് പറഞ്ഞ്

ഒഴിഞ്ഞൊഴിഞ്ഞ്

മൗനം കൃത്യമായി അളന്ന് പ്രയോഗിച്ച്

വാക്കുകൾ ഉച്ചത്തിൽ പറഞ്ഞ്

ആളുകളെ അടുപ്പിക്കാതെ

അടുപ്പിക്കാതെ

ചൂടു ചായയും

പഴംപൊരിയും

മീൻ വറുത്തതും

അകത്താക്കി അകത്താക്കി

അധ്വാനത്തിൻ്റെ

ആഴക്കിണറിലെ

മധുരം 

തട്ടിയെടുത്ത്

മോന്തിക്കുടിച്ച്

നോക്കൂ 

ചിലർ വണ്ടി കയറിപ്പോകുന്നു

വണ്ടി കയറിപ്പോകുന്നു