ഭഗവദ്ഗീത പഠിച്ചു
ചുറ്റിലും നോക്കി
ആരും പഠിച്ചവരില്ല
ആളായി അഹങ്കരിച്ചു.
മൂന്നു വർഷം ബൈബിൾ പഠനം
പഠന ക്ലാസിൽ അവതരണത്തിന് ശേഷം
ആരാധകർ ചുറ്റിലും കൂടി
ഞാൻ എന്ന് തോന്നാതെ തോന്നി
ഖുറാനും അങ്ങനെതന്നെ
അറിവില്ലാത്തവർ
പറയുന്നതെല്ലാം വിശ്വസിച്ചു
ഇല്ലാത്തതും പറഞ്ഞു
ഫലിച്ചു
ഹുങ്കായി
പഠിച്ചു കഴിയുംവരെയേ വേണ്ടൂ
ധ്യാനവും സ്ഥൈര്യവും
മൂവരുടെയും കണ്ണുകൾ ഒളിയമ്പെയ്തു
പിന്നെ നിർത്താതെ പറയലായി
പ്രയോഗമായി
ദക്ഷിണയായി
കാറായി
വീടായി
കൃഷ്ണൻ നബിയെ വിളിച്ചു
നബി ക്രിസ്തുവിനെ
ക്രിസ്തു കൃഷ്ണനെ
ചില തീരുമാനങ്ങളെടുത്തു
വായിക്കുകയോ കാണുകയോ ചെയ്യാത്തവരിലേക്ക്
കൈയ് മെയ് മറന്നുയിരുകാക്കുന്നവരിലേക്ക്
കളങ്കരഹിതരിലേക്ക്
സദ് സാര നദികളെ തിരിച്ചുവിട്ടു
കുടിലിൽ
നീണ്ട ദൂരം താണ്ടുന്നവരിൽ
കടലാഴം മുങ്ങുന്നവരിൽ
അവ നിലയുറപ്പിച്ചു
അവരെ കണ്ടറിഞ്ഞവരിലതുറവയായി
നിറഞ്ഞു
പടർന്നു
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ