ധ്വനി

വാക്കുകൾ കുറഞ്ഞ കവിതയ്ക്ക്

എവിടെപ്പോയാലും

കുറഞ്ഞ ഇടം മതി

ഇരിക്കാൻ പറയാത്തതിനോ

കസേര നീക്കിവയ്ക്കാത്തതിനോ

അതിന് പരാതിയില്ല

എത്തിച്ചേരുമ്പോഴേക്കും അന്നം തീർന്നാലും

ബാക്കിയുള്ളത് മറ്റുള്ളവർക്കായി നീക്കിവച്ചാലും സന്തോഷമേയുള്ളൂ

അവയിലെ

വാക്കുകൾ ഈയിടെയായി വീണ്ടും കുറഞ്ഞിരിക്കുന്നു

ആളുകൾ തിരക്കുമ്പോൾ

മറുപടി ഒരിളം ചിരിയാണ് 

നോക്കൂ

ഏറെ നാൾ കൂടി കണ്ട ആ ചെറു കവിത

ഇന്നൊന്നും കഴിച്ചിട്ടില്ല.

ഇല്ലായ്മയുടെ ധ്വനി അതിനെപ്പോലെ 

ആരറിയുന്നു!