ഏറ്റവും ഇഷ്ടമില്ലാത്ത ചിത്രം
ഏതെന്നു ചോദിച്ചാൽ
ഞാൻ നിങ്ങൾക്കയച്ചു തന്ന
എൻ്റെ തന്നെ ചിത്രമാണ്
ജനിച്ചതു മുതൽ അവനെ ഞാൻ കാണുന്നതല്ലേ
എനിക്കറിയാമവൻ്റെ
പകലുകൾ
രാത്രികൾ
രഹസ്യസഞ്ചാരപാതകൾ
സ്വപ്നങ്ങൾ
ഓരോ ചിരിക്കു പിറകിലെയും അവൻ്റെ ഉള്ള്
ചിരിക്കാത്തപ്പോഴുള്ള അവൻ്റെ
നേര്
എന്നെ തട്ടിക്കൊണ്ടുപോവാൻ
ആവുന്ന രീതിയിലൊക്കെ അവൻ
ശ്രമിക്കുന്നുണ്ട്
മുഴുവനായും വിട്ടുകൊടുത്തിട്ടില്ല
ഒന്നും കൊടുത്തില്ലെങ്കിലും
ചിലതെല്ലാം
അവനെടുത്തു കൊണ്ടു പോകും
നിങ്ങൾ കാണുന്ന എൻ്റെ ചിത്രത്തിൽ അവനില്ല
അവനെ പകർത്താനാണീ കളമെഴുത്ത് !
എന്നാലും പിടിതരില്ലവൻ!
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ