അവളും ഞാനും

ഞാനേയല്ല അവൾ

അവളേയല്ല ഞാൻ

ഞാൻ ചെമ്പരത്തി നടുമ്പോൾ

അവൾ റോസാച്ചെടി നടും

ഞാൻ വെണ്ടയെങ്കിൽ അവൾ പയർ

ഞാൻ മണ്ണ് കിളക്കുമ്പോൾ

അവൾ മണ്ണിരകൾക്ക് വേണ്ടി നിലകൊള്ളും

മരുപ്പച്ച മരുപ്പച്ച എന്ന് ഞാൻ പറയുമ്പോൾ

അവൾ പച്ച പച്ച എന്നു പറയും

തർക്കിച്ച് തർക്കിച്ച് കാലം പോയതറിഞ്ഞില്ല

ഞെട്ടിയുണർന്ന്

പുറത്തേക്ക് നോക്കിയപ്പോൾ

ഇളകിയ മണ്ണ്

തല പൊക്കിയ മണ്ണിരകൾ

ചെമ്പരത്തിച്ചോപ്പ്

മുൾപ്പനിനീർച്ചെടിയിലെ പൂപൂമണം

വെണ്ടകൾ

നിലം മുട്ടുന്ന പച്ചപ്പയർച്ചന്തങ്ങൾ

ഇവ

കളിയാക്കിച്ചിരിക്കുന്നു

കളിയാക്കിച്ചിരിക്കുന്നു